VAWIIN COVID-19 THU THAR LAWRKHAWM

2nd May, 2020: Covid-19 News Tawi Lawrkhawm:

• Mizoram Cabinet Meeting chuan May ni 17 thleng Lockdown kalpui leh turin thutlukna an siam. Ei leh bar lamah harsatna a awm lohna tura thlah dul deuh a ni ang.

• PM Modi chuan agriculture lamah vung taka India a kal leh theihna tura hmalakna hrang hrang turte relin vawiin khan Meeting a ko.

• Naktuk Pathianni hian Indian Armed Force-te chuan Corona virus avanga nunna thâptu doctor-te chawimawi nan, van sangah jet hmangin thil mawi tak tarlan an tum a, Tuipui lamah pawh lawng ho chhit ên an i bawk ang.

• India rama Covid-19 case hmuhchhuah zât chuan 37,776 a kai chho ta a. Mi 1,223-in an thih pui tawh.

• May ni 4 atanga thlawhna thenkhat thlawh phalhna pek tum lailawk tawh chu Lockdown extend vangin May ni 17 thleng an cancel leh ta zawk.

• New York-ah chuan kumin chhungin Zirna in zawng zawngte chu khar a ni tawh ang.

• Naktuk Pathianni-ah hian Helicopter 10 zet chuan hmun 5-ah van sang atangin pangpar an thlâk thla dawn.

• Indian Cost Guard lawng 46 zet chuan Green Flares van sangah kâp chhuakin, hmun 25 zet atangin siren an tiri ang. Tuipui kam kilometer 7516 zet an tuam ang.

• Assam chuan Sikkim tih loh an state border zawng zawng an hawng vek dawn.

• Central Congress chuan PM Modi chu lockdown an extend leh avangin an dem tih an sawi a, lockdown chungchangah ruahmanna siam thiam tawk lovah an puh a ni.

• Khawthlang Intelligence '5 Eyes' an tih mai, ram panga intelkhawmte chuan China-in khawvel an bum dan an chhui chhuah dan chuan news hrang hrang headline a luah mek.

• Delhi sawrkar chuan hmun thenkhatah zu dawr hawn a tum.

Mizoram Cabinet Meeting

Vigour News
Aizawl, Mizoram

2nd May Mizoram Cabinet Meeting: Lockdown Extend

2nd May, 2020

Vawiin khan tunlai hrileng chungchanga hmalak zel dan turte rel hovin, Mizoram Cabinet Meeting neih an ni a. Chuta an thuchhuak tlangpui chu Chief Minister, Pu Zoramthanga chuan a twitter account-ah minute 12 vela sei video a rawn tichhuak a ni.

Kan CM thu sawi ṭhenkhat lo tarlang ila:

"........India ramah pawh hei hun rei tak kan hman hnuin, India sawrkar laipuiin he lockdown hi han tih tawp mai chi rual niin an hre lova. Kan hriat ṭheuh angin India ramah pawh nikhatah he Covid avang thi ringawt pawh hi 60-70 te an ni chho a. A vanglai a thleng tawh a ni tih mai tur khawpin tunah a pun pawh a pung a ni a. Mizoram erawh kan vannei a, tihian zia-awm takin kan la kal a ni a..."

".....Kan India sawrkar chuan he kan lockdown, inkharkhipna hi May 17 thleng pawtsei a. Chuvangin, Mizoramah pawh Cabinet Meeting kan han nei a, hemi ang hian kal ve phawt ila a ṭha e kan ti a. May ni 17, tun kan thla hman mek hi a chanve pel deuh zen chuan i kal phawt teh ang kan ti a. Tichuan, kan Cabinet Meeting chuan May ni 17 thleng hi lockdown pawtsei ve ila kan han ti..." tiin Kan CM chuan Cabinet Meeting-in lockdown pawt sei tura an thutlukna chu a sawi a.

Hetih rual hian kan CM chuan kan ṭhenawm ramte dinhmun enthlak reng a nih tur thute leh kan ramri te uluk taka ven tlat a nih zel tur thute a sawi tel a ni.

Tin, Mizoram chhunga mipuite tan economy(ei leh barah) harsatna a thlen lohna turin theih ang anga inthlah dul a nih tur thu a sawi bawk.

Kan CM thu sawi hi a chipchiar leh a kimchang zawka en duhte tan a hnuaia link-ah hian lutin Twitter atang en mai theih a ni e.

VIDEO EN RAWH LE

Mizoram Chief Minister: Mr. Zoram Thanga

Vigour News
Aizawl, Mizoram

Vun ro chhan leh a enkawl dan

1st May, 2020: Hriselna Huang

Vun ro

I vun ro avangin harsatna i tawk ngai em? Vitamin D i tlâkchham vang a ni thei ngun takin i lo chhiar dawn nia.

Vitamin D, ni êng aṭanga hmuh theih hi i ruh leh ha tichak thei tu pawimawh tak mai a ni a. I chaw eia calcium awmte lo hip zung zung thei turin Vitamin D hi a ṭangkai em em bawk a ni.Hei mai bakah hian ṭangkaina tam tak a nei a, i taksa-a natna dotu a tichak thei a, i nervous system puiin diabetes leh i lung lam thlengin mumal taka thawk turin a pui thei leh zel a ni.

A tlangpuiin, nisa dawn tam loh avangin Vitamin D hi kan tlachham ṭhin a. Vun ro hi vitamin D tlakchham vang a ni thei a ni.

Vitamin D tlakchham leh vun rona in laichin dan:

Dr. Nandini Barua chuan, "Vitamin D tlakchhamna lo lanchhuah dan tlânglawn tak chu vun ro hi a ni. Medical ṭawngkam tak chuan Ichthyosis a ni. Hei hian vun landan chu a thawh dan tur pangngai anga thawk thei lovin a siam a, vun chu a ti ro ta ṭhin a ni. Hei vang hian Vitamin D hi a pawimawh em em a ni." tiin a sawi.

Tin, Vitamin D hian kan vuna arngeng leh bawl ṭek awm turte chu a veng thei tih a sawi tel bawk.

Vitamin D hi antioxidant niin, kan vun chuar tur leh râng awm turte chu a lo veng thei a. Chuvangin, vitamin D i taksa-ah a awm ṭhat chuan i vun a lang mawi thei dawn a ni. Hei bakah hian vitamin D3 i tlâkchham phei chuan sam tla nasa leh kuttin tlakna hial pawh a thleng thei a ni.

Vitamin D kan hmuh theihna te:

Ni êng hi Vitamin D kan hmuh theihna awlsam leh ṭha ber chu a ni a, mahse ni sâ-a inhem nasat lutuk erawh tih loh tur a ni.

Eitur ṭhenkhat vitamin D tamna a awm a, lo tarlang ila: Sa, Artui chhung mu, fatty fish, orange juice, Oatmeal, Bawnghnute, Soy milk leh Pa(mushroom). Heng aṭangte hian Vitamin D kan hmu thei a ni.

HRIATTUR: Heng kan han sawi tâkte hi in lo hlâwkpui ngei kan beisei a. Amaherawhchu, doctor i lo râwn hmasa tawh a, in enkawl dan tur a hrilh che a nih chuan; chumi thlâk nana kan thu rawnte hi hman kher chu a ngai lo a ni. Harsatna i neih chuan doctor rawn ngei ang che.

1st May Covid-19 Thuthar Lawrkhawm

1st May, 2020:  VAWIIN COVID-19 THUTHAR LAWRKHAWM

Langsar zual deuh te:

• ZMC-a Mizo Covid-19 patient awm mek chu ICU atangin Isolation Ward-ah sawn chhuah a ni.

• Home Ministry chuan zirlaite leh state danga hnathawk tangkhangte chu an mahni state-ah haw a phal sak a. Rel pawh a service tir dawn a ni.

• India ramah darkar 24 liamta chhungin coronavirus kai mi 1,993 hmuhchhuah belh an ni tawh: Health Ministry.

• Tun dinhmunah India-in hri kai enkawlna lamah hma a sawn hret a. 25.37% recovery rate a nei mek: Health Ministry

• Tûn mêk dar 4:15 p.m India rama Covid-19 vei hmuhchhuah tawh zât chu 35,043 a tling tawh.

• Darkar 24 liamta chhungin mi 564 tihdan an ni: Health Ministry

• AMRI Hospital, Kolkata-ah Mizo cancer vei inenkawl mekte zing ami mipa pahnih #COVID19 positive an awm tih vawiin khan hmuhchhuah a ni a, sawrkarin rang taka hma la zuiin a tul anga buaipui nghal an ni: DIPR Mizoram

• Maharastra-ah chuan plasma hmanga an enkawl chhin hmasak ber chu vawiin khan a boral. Maharastra sawrkar chuan plasma hmanga enkawlna kalpui chhunzawm zel an tum.

• Delhi CM, Arvind Kejriwal chuan plasma therapy chungchangah hmasawnna a awm niin a sawi.

Vigour News

Aizawl, Mizoram

Madhya Pradesh-ah Hmeichhe Kum 18 An Pawngsual Rawn

     

1st May, 2020

Hmeichhe kum 18 mi chu mi pasarih ten an pawngsual rawn a. An zingah hian kum tlinglo mi pathum pawh an tel nghe nghe.

April 29 zan khan he hmeichhia an pawngsual nu hi a unaupa nen an khaw lama haw tumin an kal a. Pawngsual tute hian a unaupa chu tuichhunchhuah-ah thlâkin, hmeichhia hi an pawngsual zui ta a ni.

Police te chuan mi pa 5 an man tawh a, an zingah hian kum tling lo pathum an tel. Tunah hian midang pahnihte chu tlânchhia in, Police-te hian an umzui mêk a ni.

Kotwali Police Station Incharge, Rajendra Dhurve sawi danin. Pawngsual tawktu hi a unaupa nen an khaw lama kal turin Bike-in an inphur a. Pawikhawihtute hian lo tidingin, zan dar 8:00 velah a unaupa kum 21 mi chu tuichhunchhuah-ah an paih thla a. Tichuan heng pawikhawihtute hian zing dar 2 vel thlengin hmeichhia hi an pawngsual a ni.

Heng mite hian an duh tawka an khawih hnuah hmeichhia hi an chhuah ve mai a. Chumi hnu chuan a unaupa tuichhunchhuh-a an thlâk chu a chhan thei hlauh a ni. Tichuan zing khawvar hnuah khua rawn lûtin Police Station-ah thil awm dan an hrilh, niin a sawi.

Pawngsualtu nia an rin an man tawhte hi, Shubham Bele 22, Sandeep Khatiya 23 leh kum tling lo pathum an ni a. La tlanchhe mêk an la man loh te chu, Lokesh Soni 22 leh Pawan Bele 24 te an ni.

Police-te chuan heng misualte hi IPC Sections 376(Pawngsual Case), 365(Kidnapping Case) leh 307(Tual thah tumna) thubuai te an awrhtir a ni.

Source: NDTV.com

Dubai Police Ten Bike Thlawkthei Khalh An Zir

 

       Russian Company Hoversurf siam chhuah kum 2020-a launch tura an ruahman chu Dubai Police ten khalh an zir mek.

Dubai Police ten EVTOL khalh an zir.

He bike thlawkthei hi Electric Vertical Take-off and Landing(EVTOL) an ti a, Hoversurf company California-a inkulh hian nikum(2017) khan contract an lo ziak fel tawh a, tuna an siam zawh hnu hian heng Bike-te hi US Dollar 150,000 man a nih tur thu an sawi.

He Bike manto tak hi Dubai police-te tan chuan thil lei harsa tak a ni leh dawn chuang lo a, Ferrari leh Lamborghini hnua an hmanraw neih to tak tur a ni leh dawn ta a ni.

Russian company te hian heng bike te hi an hralh hmain a lei tu turten an khalh thiam tih an finfiah phawt angai a, khalh thiam lo hnenah an hralh theih loh tur thu an tarlang nghe nghe a ni.

EVTOL lei turte chuan khalh thiam hmasak phawt angai.

He EVTOL bike hi car leh hellicopter thlen zung zung theih lohna hmun vela chelek tura an ruahman a ni a, Brig. Khalid Nassar chuan kan Artificial Intelligence Department ten kan hmang ṭangkai hle ang a ti a ni.

Hoversurf company hian hei bakah hian tun mekah 'drone taxi' an tih mai, darkar khata kilometer 250 laia chaka thlawk thei leh, a control tu hnen aṭanga 300km laia hlaa thlawk sawn thei tur chu an siam leh mek a, an siam zawh hunah chuan a man a to leh hlein a rinawm.

Premier League Player of the Month Aubameyang

    Arsenal striker Pierre-Emerick Aubameyang chu October, 2018 chhunga Player of the Month-ah thlan a ni.

Pierre-Emerick Aubameyang

Kum 29-a upa Arsenal hmatâwng hian tun season kal mekah Arsenal tan competition hrang hrangah goal 14 ngawt mai a khung tawh nghe nghe a, tun hnai Premier League game thuma a goal vawi 5 thunah hian game 1-ah chiah a start a ni.

October thla POTM thlanna turah hian Anthony Martial, Ross Barkley, Fernandinho, Matthew Ryan leh Callum Wilson te chu nominee an ni a, heng ho lakah hian Aubameyang hi a chungnung ta zawk a ni.
Arsenal team hi tun season-ah Premier League-ah khelh 11-ah vawi 7 chakin table-ah pa 5-na dinhmun an luah mek a ni.

Aubameyang tunhnai a game khelh hnuhnung pathumah a khel ṭha hle a, a game khelh hnuhnung pathumah hian goal 5 lai mai a thun thei a ni.

Fullham nena an intum ṭumin bench aṭang lo lutin goal 2 a khung.